Skiptir gríðarlega miklu máli fyrir HK

Jón Þorgrímur Stefánsson skoraði sigurmark HK í 2-1 sigri á Keflavík í 13. umferð Landsbankadeildar karla og þessi 32 ára sóknarmaður og einn af reynsluboltunum í liði nýliðanna hefur átt mikinn þátt í öllum fjórum sigurleikjum liðsins í sumar.

HK hefur unnið fjóra leiki og skorað í þeim sjö mörk. Jón Þorgrímur hefur skorað fjögur af þessum sjö mörkum, þar af sigurmark í tveimur þeirra og fyrsta mark leiksins í hinum tveimur. Hann hefur einnig lagt upp tvö af hinum mörkunum og því komið að öllum mörkum HK í sigurleikjunum nema einu. Jón Þorgrímur er með 6,75 í meðaleinkunn hjá Fréttablaðinu í þessum fjórum sigurleikjum og hefur verið valinn maður leiksins í tveimur þeirra.

Í hinum átta leikjum HK í Landsbankadeildinni hefur lítið gengið hjá HK og Jóni Þorgrími. HK hefur aðeins náð tveimur stigum í þeim og markatalan er skelfileg eða 4-19 í óhag. Jón Þorgrímur hefur spilað alla þessa leiki en náði hvorki að skora né leggja upp mark í þeim. Frammistaðan í einkunngjöf Fréttablaðsins í þessum leikjum er heldur ekki glæsileg en meðaleinkunn hans er aðeins 4,75.

„Það var fyrst og fremst liðsheildin sem skóp sigurinn á móti Keflavík en það er bara þannig að sumir leikmenn hafa ákveðna þætti í sér sem gera gæfumuninn," segir Gunnar Guðmundsson, þjálfari HK sem er mjög ánægður með Jón Þorgrím. „Jónsi hefur það í sér að vera oft á tíðum réttur maður á réttum stað og hann er góður fótboltamaður. Hann hefur mikla þýðingu fyrir okkur og í þessum leikjum sem hafa skilað okkur stigum þá hefur hann verið að skora úrslitamarkið eða gefa lokasendingu fyrir mark. Hann skiptir gríðarlega miklu máli fyrir okkur," segir Gunnar.