Pólitísk spilling einkennir REI málið

Bjarni Harðarson, þingmaður Framsóknarflokksins í Suðurkjördæmi segist ekki vera andsnúinn sameiningu REI og Geysis green energy eða útrás íslenskra orkufyrirtækja yfirleitt. Hann segist hins vegar gera athugasemdir við feril málsins sem einkennist af pólitískri spillingu að hans mati. Bjarni segir að sala ríkisins á hlut sínum í Hitaveitu Suðurnesja hafi verið mistök sem séu að reynast dýrkeypt.

Björn Ingi Hrafnsson, sagði í Kastljósi fyrr í kvöld að skoðanir Bjarna og Guðna Ágústssonar sem báðir hafa gagnrýnt REI málið harðlega, samræmdust ekki stefnu Framsóknarflokksins. „Ég get nú ekki tekið undir með Birni Inga að við Flóamenn höfum einhverjar sértækar skoðanir á þessum málum sem ganga gegn skoðunum flokksins," segir Bjarni í samtali við Vísi. Hann segist ekki gera athugasemdir við sameingu REI og Geysis green energy né við útrás íslenskra orkufyrirtækja á erlendri grund. „Ég geri hins vegar athugasemdir við þá pólitísku spillingu sem ég tel einkenna málið," segir Bjarni og bætir því við að hann telji að þeir menn sem staðið hafi að málinu, stjórnendur í REI og aðrir hafi stórspillt fyrir.

„Þetta verður til þess að Orkuveitan dregur sig út úr REI, sem er slæmt, en að mörgu leyti eðlileg afleiðing af þessari vondu aðferðarfræði sem notast var við." Bjarni er einnig uggandi yfir framtíð Hitaveitu Suðurnesja. „Þetta nýja sameinaða fyrirtæki á upp undir helming í HS og ég tel það miður að forræði hitaveitunnar sé að fara úr höndum Suðurnesjamanna og yfir í einkageirann," segir Bjarni og bætir því við að hann hafi ávallt verið þeirrar skoðunar að sala ríkisins á hlut sínum í HS hafi verið mistök. „Þau mistök eru að reynast okkur dýrkeypt núna," segir Bjarni.