Sjónvarpsstjarna verðlaunar sjálfa sig með glæsikerru

Sjónvarpskonan Ragnhildur Steinunn Jónsdóttir ekur nú um götur borgarinnar á glænýjum BMW sem hún festi kaup á fyrir skemmstu. Glæsikerran er af svokallaðri 3-línu BMW, en bílarnir í þeirri línu þykja einkar nettir og sparsamir miðað við kraftinn í þeim. Ragnhildur Steinunn staðfesti við Fréttablaðið að hún væri kominn á nýjan bíl en vildi annars ekkert hafa eftir sér um málið.

BMW-þristarnir eru af mörgum stærðum og gerðum og kosta frá rúmum þremur milljónum upp í sex milljónir. Í umfjöllun um 3-línuna á heimasíðu B&L, söluaðila BMW-bifreiða á Íslandi, segir að bílarnir skili ökumönnum ósvikna akstursánægju. Þristarnir séu hátíð skynfæranna og þá eru mögulegir kaupendur varaðir við því að þeir sem taki einu sinni um vel lagað aðgerðastýri 3-línunnar séu líklegir til að sleppa aldrei takinu af því aftur.

Þessi lýsing á nokkuð vel við Ragnhildi því hún hefur mikla og góða reynslu af BMW í gegnum fjölskyldu sína í gegnum árin. Kærasti hennar, knattspyrnumaðurinn og sálfræðineminn Haukur Ingi Guðnason, hefur keyrt BMW í nokkur ár, og hefur líklega náð að koma dellunni yfir á konu sína.

Líklegt má telja að með bílakaupunum hafi Ragnhildur verið að verðlauna sjálfa sig fyrir þrotlausa vinnu undanfarin ár. Hún útskrifaðist nýlega með glans úr Háskóla Íslands þar sem hún lærði sjúkraþjálfun en samhliða náminu hefur Ragnhildur verið í fullu starfi hjá Kastljósi RÚV auk þess sem hún hefur hún reynt fyrir sér á leiksviðinu og á hvíta tjaldinu með góðum árangri. Þá hefur hún verið kynnir á hinum ýmsu viðburðum RÚV undanfarin misseri, svo sem undankeppni Eurovision og Eddu-verðlaununum.