Voru á botninum í 80 daga

KR-ingar komu sér af botni Landsbankadeildar karla með því að vinna 1-0 sigur á Víkingum í Víkinni í fyrrakvöld.

Það var viðeigandi að fyrirliðinn Gunnlaugur Jónsson skoraði sigurmarkið en hann hefur borið af í liði Vesturbæinga í sumar. Sigurinn var fyrsti sigur KR á útivelli og aðeins sá annar í Landsbankadeildinni í sumar.

KR hafði ekki unnið leik síðan að liðið vann Fram 2-1 á KR-vellinum 28. júní. Sá sigur dugði þó ekki til að koma liðinu úr júmbósætinu en það gerði hinsvegar sá í fyrrakvöld.

KR hafði verið í 10. og neðsta sæti deildarinnar í 80 daga þegar stigin þrjú komu loksins í hús en þau þýddu að nágrannarnir í Fram sitja í botnsætinu næstu níu daga að minnsta kosti.