Kennir körlum að elda

Fríða Sophia Böðvarsdóttir kennir matreiðslu jafnt dag sem kvöld. Hún er heimilisfræðakennari í Víkurskóla í Grafarvogi og heldur jafnframt námskeið í Kvöldskóla Kópavogs.

Fríða hefur kennt nokkur mismunandi námskeið í kvöldskólanum, þar sem hún hefur verið í ein sextán ár. „Ég byrjaði með Gómsæta grænmetisrétti, svo hef ég verið með námskeið sem heitir Bökur og partíréttir og í vetur var ég með hráfæði," útskýrir Fríða. Sjálf eldar hún mikið af grænmetisfæði. „Ég var með grænmetisfyrirtæki hérna áður fyrr og var sjálf grænmetisæta," segir hún.

Síðustu tvö ár hefur Fríða þar að auki séð um matreiðslunámskeið sem eru sérstaklega fyrir karlmenn. „Ég er með eitt undirstöðunámskeið og annað framhaldsnámskeið," útskýrir hún. Fríða segir námskeiðin vera vel sótt og það af karlmönnum á öllum aldri. „Yngsti nemandi minn kom með pabba sínum, hann var ellefu ára. Þetta eru karlmenn sem hafa áhuga á mat, sem eru einstæðir eða ekklar og eins strákar sem eru svona að byrja að búa," útskýrir hún. „Svo er líka algengt að konurnar gefi mönnunum sínum námskeið í jóla- eða afmælisgjöf," bætti hún við. Fríða deilir hér uppskrift að pottrétti og brauði af karlanámskeiðinu með lesendum. Hún bendir þó á að sé fólk í tímaþröng megi auðveldlega sleppa baununum, eða kaupa þær niðursoðnar.