Eitt versta tap í sögu okkar

Þjálfari Serba var skiljanlega eyðilagður eftir tapið stóra gegn Argentínumönnum í C-riðlinum á HM í dag. Hann segir að tap sinna manna verði lengi í minnum haft og sé eitt það versta á knattspyrnuvellinum í sögu þjóðarinnar.

"Argentínumennirnir voru betri en við á öllum sviðum leiksins og áttu sigurinn fyllilega skilinn. Það hefur verið gríðarleg pressa á okkur í fjölmiðlum undanfarna daga, en það eina sem ég get sagt er að óska Argentínumönnum til hamingju með sigurinn. Við spilum í mjög erfiðum riðli og eigum einn leik eftir gegn enn einu sterku liði. Við munum gera okkar besta þar," sagði Petkovic daufur í dálkinn.

Serbar spila síðasta leik sinn í riðlakeppninni gegn Fílabeinsströndinni á miðvikudaginn og fer sá leikur fram í Munchen.