Frjálslyndir auglýstu oftast

Frjálslyndi flokkurinn birti flestar dagblaðaauglýsingar fyrir nýafstaðnar sveitarstjórnarkosningar, eða 124, en næst á eftir kemur Sjálfstæðisflokkurinn með 113 auglýsingar. Aðrir flokkar eru með mun færri auglýsingar; á milli fimmtíu og sextíu.

Samfylkingin var hins vegar með stærstu auglýsingarnar sem birtust í dagblöðum sé miðað við stærð og fjölda dálksentimetra, eða sem samsvarar tæpum 36 heilsíðum. Sjálfstæðisflokkur og Frjálslyndi flokkurinn koma svo fast á eftir með rúmar 34 heilsíður hvor flokkur. Þetta kemur fram í skýrslu Fjölmiðlavaktarinnar en hún mældi auglýsingar og umfjöllun fyrir kosningarnar í vor.

Samfylkingin birti flestar sínar auglýsingar í Fréttablaðinu, fimmtíu talsins, en aðeins níu í Morgunblaðinu. Sjálfstæðisflokkurinn birti aftur á móti 76 auglýsingar í Morgunblaðinu og þrjátíu í Fréttablaðinu.

Fyrir utan Reykjavík birtu framboð í Kópavogi flestar dagblaðaauglýsingar, eða 56, og þar af voru flestar frá Sjálfstæðisflokknum.