Owen spilar í mesta lagi einn leik

Nú er ljóst að sæti framherjans Michael Owen í enska landsliðinu á HM í sumar hangir á bláþræði, því Glenn Roader stjóri Newcastle segir að Owen muni líklega ekki ná að spila nema í mesta lagi einn leik fyrir Newcastle það sem eftir er af tímabilinu.

"Jafnvel þó við séum búnir að missa Alan Shearer í meiðsli og séum í vandræðum með að manna framherjastöðurnar, munum við ekki þrýsta á Owen að koma inn of snemma og því held ég að við eigum ekki von á nema einum leik frá honum í vor," sagði Roader. Það er því ljóst að landsliðsþjálfarinn stendur frammi fyrir erfiðri ákvörðun þegar hann nefnir hóp sinn fyrir HM í næsta mánuði.