Ekkert brúðkaup hjá Kate í bili

Fyrirsætan Kate Moss er stödd á Balí um þessar mundir þar sem fyrirhugað var að hún og rokkarinn Pete Doherty gengju í það heilaga.

Ekki virðist þó ætla að verða úr þeim áformum þar sem Doherty var handtekinn í London á föstudaginn með eiturlyf í fórum sínum og var sendur í tveggja vikna meðferð. Lögfræðingar Moss hafa gert allt sem þeir geta til að reyna að fá Doherty lausan og er fyrirsætan víst í öngum sínum vegna þessa enda var búið að skipuleggja brúðkaupið sem á að vera falleg íhugandi athöfn með ljóðalestri og tilheyrandi.

Kate og Pete hafa verið sundur og saman í nokkur ár en virðast nú vera búin að finna hamingjuna á ný á leiðinni í það heilaga. Það er að segja ef Doherty getur haldið sig frá fangelsinu.