Dæmdur fyrir að hindra lögreglu að störfum

Karlmaður hefur verið dæmdur í tveggja mánaða skilorðsbundið fangelsi í Héraðsdómi Suðurlands fyrir að brot gegn valdstjórninni með því að hafa hindrað lögreglu að störfum.

Maðurinn var ákærður fyrir að hafa lokað hliði að akri í Rangárvallasýslu með streng fyrir lögreglu og lagt bíl fyrir hliðið þegar lögregla hugðist aka inn á akurinn og hafa afskipti af syni hans vegna umferðarlagabrota. Þá var hann einnig ákærður fyrir að hafa ýtt við lögreglumanni við sama tækifæri.

Maðurinn neitaði sök fyrir dómi en dóminum þótti sannað út frá framburði vitna að hann hefði bæði hindrað lögreglu í að aka inn á akurinn og einnig ýtt við lögreglumanni. Í ljósi þess að hann hafði ekki áður komist í kast við lögin þótti hæfilegt að dæma hann í tveggja mánaða fangelsi sem er skilorðsbundið til tveggja ára. Þá ber honum einnig að greiða rúmar 300 þúsund krónur í sakarkostnað.