Fékk hjartastopp á leið á lögreglustöð

Karlmaður fékk hjartastopp og hætti að anda þegar verið að flytja hann á lögreglustöð eftir handtöku um helgina. Lögreglan var kölluð að hóteli í borginni aðfaranótt sunnudags en þar hafði karlmaðurinn gengið berserksgang og meðal annars kastað til húsgögnum og ráðist inn á herbergi sofandi hótelgesta.

Við handtöku brást maðurinn illa við og kom til nokkurra átaka að sögn lögreglu. Segist lögregla hafa beitt viðurkenndum handtökuaðferðum og lögreglutökum en maðurinn hafi áfram látið ófriðlega á leið á lögreglustöð. Stuttu áður en þangað var komið lenti maðurinn í hjartastoppi og hætti að anda. Var þá kallað á sjúkralið og tókst að endurlífga manninn. Hann var fluttur á sjúkrahús og er þar enn en honum er haldið sofandi.

Fram kemur á vef lögreglunnar að í herbergi mannsins á hótelinu hafi fundist fíkniefni. Talið er að hann hafi verið undir áhrifum áfengis eða fíkniefna. Endanleg staðfesting á því liggur ekki fyrir.