Annar frambjóðenda hafnar kosningatölum í Kongó

Jean-Pierre Bemba, forsetaframbjóðandi í Kongó, hefur hafnað úrslitum úr lokaumferð forsetakosninganna þar í landi sem gefa í skyn að Joseph Kabila, núverandi forseti landsins hafi unnið hana. Öruggt er talið að spenna í höfuðborg Kongó, Kinshasa, eigi eftir að aukast í kjölfarið en 4 létust í byssubardögum á milli stuðningsmanna forseta frambjóðendanna á laugardaginn var.

Alls eru um 17.500 friðargæsluliðar í Kongó, en það er stærsta friðargæslulið í heiminum, til þess að reyna að koma í veg fyrir að ofbeldi blossi upp á ný eftir forsetakosningarnar, sem áttu að binda endi á einhverjar mestu stríðshremmingar í Afríku.

Bráðabirgðaúrslit hafa litið dagsins ljós í 159 af 169 kjördæmum og samkvæmt þeim er Kabila með um 59.2% atkvæða en Bemba með 40.8%. Bemba er sjálfur með lið sem fer á kjörstaði og safnar úrslitum og segir að samkvæmt þeim sé hann með forskot á Kabila og hafi um 52.5% atkvæða. Bemba hefur ennfremur sagt að ef hann haldi að um svik hafi verið að ræða muni hann ekki þurfa að standa við það loforð sitt að hlýta úrslitum kosninganna.