Ítalir hafna breytingu á stjórnskipan landsins

Ítalar hafa, með afgerandi hætti, hafnað breytingum á stjórnskipan landsins. Efnt var til þjóðaratkvæðagreiðslu um breytingarnar sem hefðu aukið völd forsætisráðherrans og sjálfsstjórn héraða. Rúmlega 61% greiddu atkvæði gegn tillögunum. Kosningaþátttaka var um fimmtíu prósent. Breytingartillögurnar voru lagðar fram þegar mið- og hægri stjórn Silvio Berlusconis, fyrrverandi forsætisráðherra, var við völd. Berlusconi sagði þetta gert til að auka stöðugleika í ítölskum stjórnmálum þar sem um sextíu ríkisstjórnir hafa verið við völd á jafn mörgum árum. Romano Prodi, núverandi forsætisráðherra, var andvígur tillögunum frá upphafi og það breyttist ekki þegar hann komst til valda. Stjórnmálaskýrendur segja niðurstöðuna sigur fyrir hann.