Þora ekki út á kvöldin eftir árásir

Skemmtiferð útskriftarnema frá Verzlunarskóla Íslands til Búlgaríu hefur tekið heldur óskemmtilega stefnu því að minnsta kosti þrír þeirra hafa orðið fyrir árásum og þá hafa nokkrir verið rændir. Kveður svo rammt að þessu að hluti hópsins þorir ekki lengur út á lífið af ótta við árásir og nokkrir hafa þegar haldið heim, fyrr en áætlað var.

Ríflega 200 manna hópur úr útskriftarárgangi Verzlunarskólans hélt til Burgas-strandarinnar í Búlgaríu um mánaðamótin til að fagna áfanganum. Sú ferð hefur ekki reynst eins skemmtileg og margir vonuðust til vegna ýmissa atvika. Ráðist hefur verið á að minnsta kosti þrjár stúlkur í ferðinni að kvöldlagi eða um nótt, þar af eina þeirra með hníf, en tvær stúlknanna þurftu að leita aðstoðar á sjúkrahúsi vegna áverka sinna. Þá hafa nokkrir aðrir lent í minni háttar atvikum eins og ránum um hábjartan dag.

Þórunn Elísabet Bogadóttir, fráfarandi forseti Nemendafélags Verzlunarskólans, segir atburðina haft sín áhrif á hópinn. Fólk fari ekki eitt út á kvöldin og jafnvel ekki á daginn og þá haldi margir sig inni á hótelum á kvöldin í stað þess að fara út á lífið. Á hótelinu séu þau örugg.

Tómas Þór Tómasson, framkvæmdastjóri ferðaskrifstofunnar Apollo, sem seldi hópnum ferðina segist ekki hafa fengið kvartanir frá hópnum en nokkrir áhyggufullir foreldrar hafi haft samband við skrifstofuna. Fararstjórar hafi reynt að aðstoða fólk þegar eftir því hafi verið leitað og hann viti um fjóra útskriftarnema sem hafi farið heim til Íslands fyrr en áætlað var vegna atvikanna.

Hann segir Burgas-ströndina ekki mikinn ofbeldsstað en það sé alltaf slæmt ef fólk lendi í atvikum sem þessum. Brýnt hafi verið fyrir krökkunum að fylgja almennum leikreglum sem gildi á stöðum sem þessum, að vera ekki ein á ferð eftir myrkur og gæta almennt að sér á skemmtanalífinu.