Megn stækja í frystihólfaleigu í Reykjavík

Viðskiptavini frystihólfaleigu í Dugguvoginum brá heldur betur þegar hann kom að sækja matvæli í frystihólf sitt í dag. Frost hafði verið tekið af geymslunni og blóð úr matvælum rann eftir gólfinu.

Frystihólfaleigan hefur verið starfrækt á neðstu hæð hússins í Dugguvoginum um árabil og en þar eru nokkur hundruð frystihólf sem almenningur hefur getað leigt. Um miðjan síðasta mánuð barst Heilbrigðiseftirlitinu ábending um að ýmsu væri þar ábótavant. Haft var samband við einn af forsvarsmönnum leigunnar sem gaf þau svör að starfsemin væri að hætta og viðskiptavinir yrðu látnir vita um það og geymslan tæmd. Síðan eru liðnar um þrjár vikur.

Viðskiptavinur sem hefur haft frystihólf í geymslunni um árabil fór í dag að sækja matvæli í hólf sitt og sá hann þá hvernig frost hafði verið tekið af og voru öll hans matvæli ónýt. Tjónið hleypur á tugum þúsunda. Hann hafði ekki verið látinn vita af því að hætta ætti starfseminni og stóð í þeirri trú að allt væri í stakasta lagi.

Þegar fréttamann NFS bar að garði í dag mætti honum megn stækja af úldnu kjötmeti og fleiri matvælum. Að minnsta kosti nokkrir dagar eru síðan frost var tekið af miðað við ástandið í geymslunni í dag. Fjöldi hólfa var enn læstur og inni í þeim mátti sjá matvæli. Ekki voru neinar merkingar um lokunina innandyra eða utan.

Hjá Heilbrigðiseftirlitinu fengust þær upplýsingar að þar á bæ vissu menn ekki betur en að búið væri að loka geymslunni en að málið yrði kannað nánar. Forsvarsmenn fyrirtækisins sem reka geymsluna sögðu í samtali NFS að tæma ætti geymsluna seinna í dag og að flest allir viðskiptavinir hefðu verið látnir vita af lokuninni. Ekki fengjust þó svör við því afhverju frost var tekið af áður en geymslan var tæmd.