Neville kærður

Gary Neville, fyrirliði Manchester United, hefur verið kærður fyrir ósæmilega hegðun sína eftir leik United og Liverpool á dögunum þegar hann fagnaði sigurmarki félaga síns með því að hlaupa í átt að stuðningsmönnum andstæðinga sinna og benti á merki Manchester United á treyju sinni.

Neville hefur tíma til 10. febrúar til að áfrýja, en gera má ráð fyrir að hann sleppi með sekt í stað leikbanns. "Þetta er ótrúlegt. Ég var ekki að reyna að gera lítið úr neinum, maður bara missir sig dálítið við þessar aðstæður og það sem mér finnst broslegast er að það er einmitt fólkið sem sakar mann um að hafa ekki ástríðu á vellinum sem er að skammast yfir því að maður fagni mörkum," sagði Neville gáttaður.