Ætlar að leita að nýju starfi áður en HM byrjar

Sven Goran Eriksson, landsliðsþjálfari Englendinga hefur lýst því yfir að hann ætli ekki að bíða með að leita sér að nýju starfi þangað til eftir HM. Enska knattspyrnusambandið hefur lagt blessun sína yfir að kappinn byrji leit sína að nýrri vinnu áður en HM byrjar. ,,Ég ætla mér að vera áfram í þjálfun og í knattspyrnuheiminum gengur það þannig fyrir sig að þú ferð ekki og leitar að vinnu, þér er einfaldlega boðin vinna. En ef ég ætla mér að fá vinnu fyrir næsta tímabil hef ég ekki efni á að sitja með hendur í skauti þangað til eftir heimsmeistarakeppnina." Enska knattspyrnusambandið hefur gert ríflegan starfslokasamning við Eriksson en að sögn talsmanna sambandsins fær Eriksson ekki eyri af þeim peningum ef hann útvegar sér starf áður en HM í Þýskalandi lýkur.