Fimm hundruð kílóa þýfi

Heitum potti var stolið frá Brúnavegi 13 í sumarhúsabyggðinni í Grímsnesi um helgina. Að sögn lögreglunnar á Selfossi þá er potturinn fjögur til fimm hundruð kíló og metinn á sex hundruð þúsund krónur.

Aðstæður við sumarhúsið eru þannig að ljóst er að þjófarnir hafa að öllum líkindum notað vörubíl með krana til að lyfta pottinum frá húsinu. Telur lögreglan að potturinn hafi verið numinn á brott aðfaranótt sunnudags en til blárrar vörubifreiðar sást um það leyti. Lögreglan á Selfossi biður fólk að hafa samband í síma 480-1010 ef það hefur upplýsingar um málið.