Bush eldri til Íslands í júlí

George H. W. Bush, fyrrverandi forseti Bandaríkjanna og faðir núverandi forseta, hefur þegið boð Ólafs Ragnars Grímssonar, forseta Íslands um að heimsækja landið 4.-7. júlí næstkomandi.

Bush kemur til landsins 4. júlí, á þjóðhátíðardegi Bandaríkjanna, og snæðir kvöldverð á Bessastöðum. Með í för verður Sig Rogich sem var sendiherra Bandaríkjanna á Íslandi í forsetatíð hans.

Bush mun svo halda til laxveiða í boði Orra Vigfússonar, formanns Verndarsjóðs villtra laxastofna, en þann málstað styður forsetinn fyrrverandi eindregið.