46 drepnir í Írak í gær

Að minnsta kosti 25 manns féllu og um sjötíu eru særðir eftir að sprengja sprakk í grennd við vinsælan grænmetismarkað í norðurhluta Bagdad, höfuðborgar Íraks, í gærkvöld. Alls féllu því 46 manns í landinu í sprengjuárásum í gær. Tólf féllu í sjálfsmorðssprengjuárás í bænum Hilla og níu féllu í sprengjutilræði í bakaríi í austurhluta Bagdad. Þá særðist á annað hundrað manns í tilræðunum þremur. Forsætisráðherra landsins sagðist í gær reiðubúinn að beita hörku til að stöðva hópa glæpa- og hryðjuverkamanna í borginni. Hvernig hann ætlar að fara að, á þó enn eftir að koma í ljós.