Neitar leikaraskap

Thierry Henry hefur neitað að hafa notað leikræna tilburði þegar hann fiskaði aukaspyrnuna umdeildu sem varð aðdragandinn að öðru marki Frakka gegn Spánverjum í gær. Þjálfari Spánverja kvartaði sáran undan dómgæslunni í þessu tilviki, en Henry heldur fram sakleysi sínu í málinu.

Carles Puyol, varnarmaður spænska liðsins, ásakaði Henry líka um að hafa sýnt leikræna tilburði í atvikinu, en stutt er síðan þeir deildu eftir úrslitaleikinn í meistaradeildinni. Þar þótti Henry sá spænski vera grófur og sagðist kannski taka upp á því að láta sig detta oftar í framtíðinni.

"Ég veit ekki af hverju Puyol braut á mér, því vinstri bakvörður þeirra var alveg við það að ná boltanum hvort sem var. Ég er ekki svindlari," sagði Henry.