Tryggvi og Marel skoruðu báðir þrennu

Tryggvi Guðmundsson skoraði þrennu fyrir FH sem burstaði Þróttara 6-0 í Deildabikar KSÍ í dag og slíkt hið sama gerði Marel Baldvinsson fyrir Breiðablik sem vann ÍBV 3-1. Þá unnu Víkingar 1-0 sigur á Fram.

Tryggvi fór fyrir FH liðinu sem valtaði yfir slaka Þróttara og Íslandsmeistararnir afgreiddu leikinn á sannfærandi hátt. Sigurvin Ólafsson skoraði tvö mörk og Matthías Vilhjálmsson eitt auk þrennunnar frá Tryggva.

Marel Baldvinsson byrjar vel með Breiðablik en hann sneri heim úr atvinnumennsku um síðasta haust. Marel skoraði glæsilega þrennu fyrir Breiðablik sem vann ÍBV 3-1 en mark Eyjamanna var sjálfsmark.

Víkingar báru sigurorð af Fram í Egilshöllinni í kvöld en eina markið skoraði Þorvaldur Sveinsson á upphafsmínútum leiksins með glæsilegu skoti utan teigs. Framarar sóttu mikið og meðal annars fékk Helgi Sigurðsson nokkur góð færi til að skora en Víkingar héldu út og lönduðu sigrinum.