Framsókn fundar um forystu í flokknum

Landsstjórn og þingflokkur Framsóknarmanna hittast í kvöld til að freista þess að ná sáttum um forystu í flokknum. Að minnsta kosti fjögur framsóknarfélög hafa skorað á Guðna Ágústsson, varaformann flokksins, að taka við formannssætinu við brotthvarf Halldórs Ásgrímssonar. Talið er hins vegar líklegt að Halldór Ásgrímsson endurskoði ákvörðun sína um að hætta hverfi Guðni ekki af sviðinu á sama tíma og hann.

Meirihluti framsóknarmanna vill fá að kjósa sér formann gangi það eftir að Halldór Ásgrímsson víki úr fomannsstóli Framsóknarflokksins. Miðstjórnarfundur Framsóknarflokksins sem á að vera á föstudag hefur samkvæmt reglum flokksins heimild til að velja sér formann og hefur Finnur Ingólfsson verið nefndur í því sambandi. Vaxandi þrýstingur er hinsvegar á það frá almennum flokksmönnum að allir flokksmenn fái að kjósa sér formann. Landsstjórn og þingflokkur Framsóknarflokksins hittist í kvöld til að freista þess að ná sáttum um framhaldið. Viðmælendur Fréttastofu segja að útilokað sé að Halldór Ásgrímsson standi upp fyrir Guðna Ágústssyni eða Siv Friðleifsdóttur meðstjórnandum hans í flokknum. Náist ekki samkomulag um Finn Ingólfsson verði núverandi forysta að sitja öll áfram fram að flokksþingi.

Landssamband framsóknarkvenna hittist á fundi klukkan fimm til þess að hafa ályktun tilbúna fyrir fundinn í kvöld. Viðmælendur fréttastofu töldu líklegt að Framsóknarkonur hefðu ályktað í þá veru að beðið yrði átekta fram að flokksþingi þegar ný forysta yrði kjörin. Guðni Ágústsson, varaformaður flokksins hefur ekki viljað tala við fjölmiðla í dag en fjögur félög, í Dalasýslu, Rangárvallasýslu, Skagafirði og Árborg hafa skorað á hann að taka við formennsku í flokknum fram að flokkþingi og bjóða sig þá fram til formennsku.

Framsóknarmenn í Reykjavíkurkjördæmi suður þar sem Björn Ingi Hrafnsson aðstoðarmaður forsætisráðherra er áhrifamikill hefur þegar sent frá sér ályktun þar sem núverandi forysta er hvött til að sitja út kjörtímabilið. Steingrímur Hermannsson fyrrverandi formaður flokksins hrósaði Halldóri fyrir þá ákvörðun að hætta þegar fréttastofa náði tali af honum í dag. Ákvörðunin sé skynsamleg vegna óeiningar sem ríkt hafi um Halldór og vegna lélegs gengis flokksins í sveitarstjórnarkosningunum. Hann segist hins vegar ekki sjá ástæðu til þess að Guðni Ágústsson hætti. Steingrímur segist hafa mikið álit á Finni Ingólfssyni en hann verði að komast til áhrifa í flokknum með kosningu á Flokksþingi.