Paris í kattarlíki

Hótelerfingjann Paris Hilton er nú hægt að kaupa í kattarlíki. Japanskur leikfangaframleiðandi sem selur kattardúkkurnar Hello Kitty hefur hafið sölu á slíkri dúkku sem minnir um margt á Paris.

Kattardúkkan er hvít með ljóst hár og klædd í bleika yfirhöfn, en eins og margir vita er bleikur uppáhaldslitur Parisar Hilton. Agnarsmár Chihuahua-hundur kemur með í kaupunum og er hann vísun í hund Parisar, Tinkerbell.

Einnig er hægt að fá alls konar fylgihluti með nýju Hello Kitty dúkkunni, handtöskur og hár­spangir svo fátt eitt sé talið.

Því miður þurfa heitir aðdáendur Parisar Hilton að leggja á sig langferð til að festa hendur á dúkkunni því hún er einungis til sölu í Japan.