Sjálfstæðismenn þrýsta á endurnýjun ríkisstjórnar

Sjálfstæðismenn leggja ofurkapp á að endurnýjuð ríkisstjórn undir forsæti Geirs Haarde taki til starfa á allra næstu dögum. Varaformaður Sjálfstæðisflokksins, Þorgerður Katrín Gunnarsdóttir, segir að of löng óvissa geti reynst skaðleg.

Það tefur hins vegar viðræður oddvita stjórnarflokkanna að þeir eru í dag og á morgun meira og minna bundnir vegna leiðtogafundar Eystrasaltsríkjanna sem fram fer hérlendis. Geir H. Haarde, verðandi forsætisráðherra, vildi ekkert tjá sig um stöðu mála þegar fréttamenn spurðu hann á Þingvöllum í dag eftir fund hans með utanríkisráðherra Þýskalands.

Varaformaður fjárlaganefndar Alþingis, Einar Oddur Kristjánsson, segir að brýn verkefni bíði ríkisstjórnarinnar sem þoli enga bið; að verja krónuna og kjarasamninga. Nýtt ráðuneyti Geirs H. Haarde verði að taka til starfa helst í dag og í allra síðasta lagi um helgina.

Jafnvel forystumenn innan stjórnarflokkana taka sér orðið stjórnarkreppa í munn enda ríkir algjör óvissa um hvernig lykilráðherraembætti verða mönnuð, þar á meðal embætti fjármálaráðherra og utanríkisráðherra. Utanríkisráðherraefni Sjálfstæðisflokks eru talin Björn Bjarnason, Þorgerður Katrín Gunnarsdóttir og Árni M. Mathiesen, hreppi Framsóknarflokkur fjármálaráðuneytið, sem hann sækist eftir. Kjósi Björn Bjarnason að flytja sig er talið líklegast að hann verði utanríkisráðherra og að Árni M. Mathiesen myndi þá að öllum líkindum verða dóms- og kirkjumálaráðherra. Auk fjármálaráðuneytis er talið að Sjáfstæðisflokkur gæti misst annaðhvort Umhverfisráðuneyti eða Samgönguráðuneyti yfir til Framsóknarflokks og þykir mest óvissa því vera um ráðherradóm Sigríðar Önnu Þórðardóttir og Sturlu Böðvarssonar. Þrátt fyrir neitun Finns Ingólfssonar í gær um frekari stjórnmálaafskifti hafa forystumenn í dag haldi því opnu að hann verði næsti fjármálaráðherra og þá án þess að sækjast eftir flokksformennsku. Fáist Finnur ekki þykir Magnús Stefánsson, formaður fjárlaganefndar, nú líklegur fjármálaráðherra. Önnur ráðherraefni Framsóknarflokksins eru helst talin Hjálmar Árnason, og þá sem utanríkisráðherra, lendi sá stóll framsóknarmegin, sem og Jónína Bjartmarz. Enn er þó óvíst að Sjálfstæðisflokkur gefi eftir ráðuneyti til samstarfsflokksins.