Mikil áhætta að velja Walcott

Sven-Göran Eriksson, landsliðsþjálfari Englendinga, segist viðurkenna að það sé mikil áhætta fólgin í því að velja hinn 17 ára gamla Theo Walcott í enska landsliðshópinn, en Walcott hefur enn ekki spilað leik fyrir aðallið Arsenal síðan hann gekk í raðir félagsins fyrir 17 milljónir punda í janúar.

"Ég veit að það er nokkur áhætta að velja Walcott í hópinn, en mig langar að sjá hann í hópnum. Hann er öskufljótur og spennandi leikmaður, en hraði er mikilvægur í fótbolta í dag. Það kann að líta út fyrir að vera óraunhæft að ég skuli velja hann í stað manna eins og Defoe eða Darren Bent, en stundum verður maður að fara eftir tilfinningu sinni. Við erum með sóknarsinnað og skemmtilegt lið," sagði Eriksson.