Örlagadagur Ragnars Skjálfta

Næstkomandi sunnudag, 30. júlí, ræðir Sirrý við Ragnar Stefánsson um stóra örlagadaginn í lífi hans. Fyrir nokkrum árum lenti þessi þjóðþekkti vísindamaður í alvarlegu bílsslysi þar sem ungur samstarfsmaður hans lést.

Slysið skildi eftir ör á sálinni. Ragnar Skjálfti hefur breytt lífi sínu verulega eftir slysið sem átti sér stað þennan örlagaríka dag. Ragnar greinir frá lífi sínu í Svarfaðardal og segir Sirrý hvernig tímarnir hafa breyst - bandaríski herinn er farinn af landinu en borgarbarnið og herstöðvarandstæðingurinn Ragnar Stefánsson er orðinn sveitamaður sem spilar golf.

Ragnar segir frá hvernig viðhorf hans til lífsins hefur breyst eftir alvarlegt bílslys. Stærsta ferðahelgi ársins nálgast og vilja aðstandendur Örlagadagsins of NFS vekja athygli landsmanna á að fara varlega í umferðinni. Komum heil heim.

Eins og nafnið gefur til kynna fjallar Örlagadagurinn um örlagaríka daga.

Áhugavert fólk hefur fallist á að greina Sirrý frá "örlagadeginum" stóra í lífi sínu; degi þar sem mikil straumhvörf áttur sér stað, stór atburður,

gleði- eða sorgaratburður, sem hefur haft varanleg áhrif á líf viðkomandi.

Þættirnir eru 12 talsins og í hverjum þætti greinir einn áhugaverður viðmælandi frá örlagadegi sínum; á hispurslausan og innilegan hátt.

Aðrir "Örlagadagar" með Sirrý - í sumar verða m.a. sem hér segir: "Hætti í vinnunni og hjólaði um heiminn", "Lífið eftir pólitík", og "þegar hann varð hún".

Sirrý þarf vart að kynna en hún á að baki áralanga reynslu í íslenskum fjölmiðlum, jafnt í sjónvarpi, útvarpi sem tímaritaútgáfu. Sirrý stýrði spjallþættinum Fólk á Skjá einum, en áður hafði hún starfað sem ritstjóri á Vikunni, við þáttagerð fyrir Ríkisútvarpið og sem þula í Ríkissjónvarpinu.