Chelsea-leikmenn í meirihluta

Sex knattspyrnumenn hafa nú verið tilnefndir sem knattspyrnumenn ársins á Englandi af samtökum atvinnuknattspyrnumanna þar í landi, en þrír af leikmönnunum sex leika með Englandsmeisturum Chelsea. Þetta eru þeir Frank Lampard, Joe Cole og handhafi verðlaunanna, John Terry. Þá eru Wayne Rooney hjá Manchester United og Steven Gerrard hjá Liverpool einnig tilnefndir og Thierry Henry hjá Arsenal er eini útlendingurinn á listanum.

Athygli vekur að Wayne Rooney er einnig á listanum yfir besta yngri leikmann ársins, en hann er handhafi þeirrar nafnbótar frá í fyrra. Auk Rooney eru í þeim flokki tilnefndir þeir Aaron Lennon hjá Tottenham, Cesc Fabregas hjá Arsenal, Darren Bent hjá Charlton, Anton Ferdinand hjá West Ham og félagi Rooney hjá Manchester United, Cristiano Ronaldo.

Tilkynnt verður um valið þann 23. apríl næstkomandi.