Allt er gull sem glóir

Gulllitaður klæðnaður byrjaði að ryðja sér til rúms innan tískunnar í kringum diskótímabilið. Þá var glamúr allsráðandi og allt sem glitraði var í tísku. Hipphopparar hafa síðan tekið yfir gullið og færðu það yfir á okkar tíma með risastórum gullhálsmenum sem þeir kalla svo skemmtilega "bling bling".

Nú er gull ákveðinn staðall fyrir kvenleika og glamúr. Það kom aftur upp á yfirborðið fyrir um það bil tveimur árum og hefur ekkert dottið niður síðan. Ef marka má tískupalla fyrir komandi vetur mun gulllitað vera mikið í bland við svart, ljósgrátt og silfurlitað. Það er nefnilega ákveðinn fílingur fyrir andstæðum þennan veturinn. Gull og silfur saman hefur verið óskrátt lögbrot í regluskrám tískuheimsins en nú er sú samsetning leyfileg.

Kosturinn við gulllitaðan er sá að hann passar við alla liti og setur glamúrsvip á hvaða flík sem er. Enda er hann litur toppsætisins.