Fagnar 120 ára afmæli í ár

Landsbanki Íslands fagnar 120 ára afmæli sínu á laugardag með dagskrá á fjórtán stöðum víðsvegar um land.

"Það var tekin ákvörðun hjá bankaráði að minnast þessara tímamóta með veglegum hætti og munum við gera það í heilt ár, en upphaf afmælisársins og hápunkturinn verður núna á laugar­daginn," segir María Björk Óskarsdóttir, framkvæmdastjóri afmælisnefndar bankans.

Landsbankinn er elsti banki landsins og tók fyrst til starfa í Bakarabrekku í Reykjavík sem síðar var nefnd Bankastræti eftir honum. Í tilefni afmælisins kemur út söguannáll Landsbankans sem Eggert Þór Bernharðsson sagnfræðingur hefur tekið saman.