Seldi lag í hafnaboltaauglýsingu

Nýverið var fjallað um plötuna Hole and Corner með íslenska tónlistarmanninum Bela í bandaríska tónlistartímaritinu Billboard. Bela er listamannsnafn Baldvins Ring­sted sem fluttist til Glasgow í listnám á síðasta ári.

Á heimasíðu Billboard segir að á plötunni sé blandað saman gömlu rokki og nýju. Raddirnar séu viðkvæmar og slide-gítarleikurinn sé myrkur en fágaður. "Stundum hljómar röddin eins og John Mayer en bjartur og naumhyggjulegur gítarleikurinn í lögum eins og Stones minnir meira á Nick Drake," segir í umfjölluninni.

Útgáfusamningur í BretlandiÁður en Baldvin fór út hafði hann tekið upp töluvert af efni og fékk þar m.a. aðstoð Pálma Gunnarssonar, bassaleikara, og Birgis Hilmarssonar, söngvara Ampop, sem syngur bakraddir og spilar á ásláttarhljóðfæri í nokkrum lögum.

Þegar út var komið sendi Bela demó á nokkur útgáfufyrirtæki og Say Dirty Records hringdu til baka nánast samdægurs og buðu samning. Þegar sá var í höfn var hafist handa við að púsla saman plötu og Marcus MacKay (Snow Patrol, Reindeer Section, Zephers) var fenginn til aðstoðar, sem og ýmsir hljóðfæraleikarar. Söngkonan Gemma Hughes syngur jafnframt í tveimur lögum.

Upptökur á sjö stöðum

Baldvin segist hafa byrjað á plötunni snemma á síðasta ári. "Það er búið að taka hana upp á sjö stöðum allt í allt. Maður er að innheimta greiða hjá einhverjum og betla út greiða hjá öðrum," segir Baldvin, sem ólst upp við að hlusta á allskonar tónlist. Segir hann plötuna endurspegla það að miklu leyti. "Þetta er svolítið eins og ég ólst upp við hjá foreldrum mínum. Ég man þegar ég var lítill þá festust í manni hljómsveitir eins og Crosby og Stills og America og allt það dót. Svo fer maður seinna að hlusta á Nick Drake og eitthvað nýrra eins og Elliott Smith og Belle and Sebastian. Þessir listamenn hafa líka svolítið verið að taka úr þessu gamla," segir hann. Lag í auglýsinguHole and Corner var gefin út í Bretlandi þann 19. júní en fer þó ekki í almenna dreifingu fyrr en í lok júlí þar sem útgáfudeginum var frestað. Platan er ekki enn komin út í Bandaríkjunum en einhverjir Bandaríkjamenn sem búa á austurströndinni hafa þó hugsanlega heyrt lagið Jerome sem er að finna í hafnabolta­auglýsingu nokkurri.

Bela mun spila hér á landi í júlí og heldur meðal annars tónleika í verslun 12 Tóna og spilar á Rás 2.

Þeir sem vilja nálgast frekari upplýsingar um Bela er bent á heimasíðuna www.myspace.com/belamusicforpeople.freyr@frettabladid.is