Unnur Birna og Pétur keyptu ein­býlis­hús í Garða­bæ

Kaupsamningur var undirritaður þann 4. júní síðastliðinn.

Nýverið settu Unnur Birna og Pétur Rúnar raðhús sitt við Kjarrmóa á sölu.

Húsið við Löngumýri er 306 fermetrar að stærð á þremur hæðum, byggt árið 1989. 

Eignin skiptist í forstofu, eldhús, stórar og opnar stofur, fjögur svefnherbergi, tvö baðherbergi, þvottahús og bílskúr sem hefur verið breytt í stúdíóíbúð. 

Stofurýmið er opið og bjart með fallegu viðarparketi með fiskibeinamynstri. Þaðan er útgengt á skólsæla verönd með heitum potti. Eldhúsið er opið við stofu, prýtt veglegri viðarinnréttingu með góðu skápaplássi og notalegum borðkrók.

Fallegur stálstigi með viðarþrepum liggur upp á efri hæð þar sem stórir gluggar eru við og yfir stiga.

Á rishæð eru tvö barnaherbergi, rúmgott hjónaherbergi með fataskápum og flísalagt baðherbergi með baðkari og sturtu. Þar er einnig sjónvarpshol með vinnuaðstöðu og góð lofthæð. 

Í kjallara er auka íbúð með eldhúsi, stofu, baðherbergi og tveimur svefnherbergjum.