Væb fara í tón­leika­ferð um Evrópu

Hljómsveitin Væb var framlag Íslands í Eurovision í ár þar sem hún komst í úrslitakvöldið og stóð sig með mikilli prýði. Síðan þá hafa vinsældir sveitarinnar aukist jafnt og þétt og hefur lagið þeirra RÓA verið spilað tæplega 18 milljón sinnum á steymisveitunni Spotify.

Væb-bræðurnir Hálfdán Helgi og Matthías Davíð Matthíassynir eru spenntir fyrir því að spila fyrir Evrópu og hlakka mikið til, að því er kemur fram í tilkynningu.

„Fyrir nokkru sendum við út könnun til aðdáenda okkar í Evrópu þar sem við óskuðum eftir tillögum að borgum til að heimsækja og halda tónleika. Viðbrögðin voru svakaleg, mörg þúsund manns svöruðu og hvöttu okkur til að koma í sína heimaborg. Þegar við sáum allan þennan áhuga ákváðum við bara að skella okkur í túr um Evrópu. Þetta verður amazing. Here we go,“er haft eftir bræðrunum í tilkynningu.

Forsala á tónleika fyrir þau sem eru á póstlista VÆB hefst á morgun, föstudag, kl. 9.00 á íslenskum tíma, en hægt er að skrá sig á póstlistann hér. Almenn miðasala hefst svo á mánudaginn 23. júní kl. 9.00