Hert lög um hvíldartíma

Á seinustu starfsdögum Alþingis voru samþykktar breytingar á lögum sem varða reglur um hvíldartíma bílstjóra hópferða- og farmflutningabíla.

Meðal breytinga er að eftirlitsmenn Vegagerðarinnar hafa nú leyfi til að banna frekari akstur slíks ökutækis meðan beðið er eftir að lögregla komi á staðinn, en áður máttu þeir aðeins stöðva ökutækið ef grunur lá um að ekki væri farið eftir reglum um hvíldartíma, frágang farms eða heildarþyngd ökutækis.

Fyrir tveimur árum féll dómur í Hæstarétti þar sem bílstjóri vöruflutningabíls var sýknaður af ákæru fyrir brot á reglum um hvíldartíma vegna þess að lögin þóttu ekki nógu skýr.