Norrænt menningarmót

Átján ungmenni frá fimm bæjarfélögum á Íslandi taka þátt í Menningarmótinu Ung i Norden sem fer fram í Þórshöfn í Færeyjum. Íslensku þátttakendurnir eru á aldrinum 14-16 ára en þau munu hitta rúmlega 200 önnur ungmenni frá Norðurlöndunum sem einnig taka þátt í mótinu.

Sara Guðmundsdóttir, leik- og söngkona, er listrænn stjórnandi hópsins en þetta er í fjórða sinn sem hún gegnir því hlutverki á vegum Íþrótta- og tómstundanefndar Hafnarfjarðar. Ég fór sjálf á Menningarmótið þegar ég var unglingur og hafði einstaklega gaman af. Í þrjú skipti hef ég aftur á móti gegnt stöðu listræns stjórnanda og haldið utan um íslensku hópana á Ung i Norden, þar sem ég gegni einnig hlutverki fararstjóra, segir Sara.

Að sögn Söru hefur Hafnarfjarðar­bær séð um þetta verkefni fyrir Íslands hönd en 15-20 íslenskir unglingar komast að í hvert sinn. Í þetta sinn koma þátttakendur frá Höfn í Hornafirði, Vestmannaeyjum, Reykjanesbæ, Grindavík, Kópavogi, Hafnarfirði og Ísafirði. Hún segir íslenska hópinn ætla að setja upp tuttugu mínútna leikþátt sem hann hafði aðeins tvo daga til að æfa. Þetta voru býsna erfiðir tveir dagar nú um síðustu helgi en okkur tókst þó að berja atriðið saman í lokin og ég er mjög ánægð með útkomuna.

Krakkarnir eru afskaplega opnir og óhræddir og það varðar mestu. Sara segir atriðið byggjast á látbragðsleik og að unglingarnir séu allir klæddir í svört föt frá toppi til táar en andlit þeirra máluð hvít og eins beri þau hvíta hanska. Við þræðum síðan sögu Íslands á gamansaman hátt en ég gegni sjálf hlutverki sögumanns og þau koma síðan fram á sviðið í nokkrum hópum og leika með látbragði það sem fram kemur í máli mínu. Þá tókum við saman tónlistarsyrpu sem spiluð er undir meðan á sýningu stendur. Sara segir ungmenninn hafa æft atriðið bæði á norsku og ensku til að tryggja að allir áhorfendur skilji hvað fram fer á sviðinu.

Hin löndin sem taka þátt í Menningarmótinu eru Grænland, Finnland og Danmörk. Hóparnir dvelja í viku í Þórshöfn en unglingarnir munu sækja í kringum 16 listasmiðjur undir stjórn atvinnulistamanna og vinna saman að þremur stórum atriðum sem verða flutt í Norðurlandahúsinu síðasta dag menningarmótsins. - brb