Nýr norrænn ferðarisi í eigu Íslendinga

Nýr íslenskur ferðarisi varð til á Norðurlöndunum í dag með stofnun Northern Travel Holding, sem er í eigu Fons, FL Group og Sunds. Hið nýja félag hefur keypt Sterling flugfélagið, Iceland Express, yfir helmings hlut í flugfélaginu Astraeus, stóran hlut í sænsku ferðaskirfstofunni Ticket og alla hluti í dönsku ferðaskrifstofunni Hekla Travel. Samanlögð velta þessara félaga er áætluð um 120 milljarðar króna.

Það er mikið um að vera hjá íslenskum fjárfestum þessa dagana. FL group keypti rúmlega 6 prósenta hlut í bandaríska félaginu AMR í gær, en félagið er móðurfélag American Airlines, stærsta flugfélags í heimi og flugfélagins Eagle Air. Heildarvirði þessarar fjárfestingar er 28 milljarðar króna, eftir því sem Fréttablaðið greinir frá í dag.

En þar með er ekki öll sagan sögð. FL group tilkynnti í dag að félagið hefði selt danska Sterling flugfélagið til nýs norræns ferðarisa, Norethern Travel Holding fyrir 20 milljarða króna. En þetta nýja félag er reyndar að hluta í eigu FL Group. Stærsti hluthafi þessa nýja norræna ferðarisa er Fons með 44 prósent og síðan eiga FL Group 34 prósent og Sund 22 prósent.

Northern Travel Holding á eftirfarandi félög ýmist alveg eða að hluta: Iceland Express að öllu leyti, fimmtíu og eins prósenta hlut í breska flugfélaginu Astraeus, tæplega 30 prósenta hlut í sænsku ferðaskrifstofunni Ticket, en hún er skráð á sænska hlutabréfamarkaðnum og alla hluti í dönsku ferðaskrifstofunni Hekla Travel. Samanlagt flytja þessi félög 7,5 milljónir farþega á ári, eða tæplega fjórum sinnum fleiri farþega en fara um Keflavíkurflugvöll.

Northern Travel verður mjög öflugt félag með Sterling, stærsta lággjaldaflugfélag Norðurlandanna innan sinna raða og þá eru ferðaskrifstofurnar í Svíþjóð og Danmörku einnig mjög stórar og ekki er langt síðan breska flugfélagið Astraeus gerði stóran samning við Virgin flugfélagið. Hannes Smárason, forstjóri FL Group, segir að með sölunni á Sterling til hins nýstofnaða félags, sé síðasta dótturfélagið á sviði flugrekstrar í eigu FL selt. Pálmi Harladsson, forstjóri Fons, verður stjórnarformaður í Northern Travel Holding.