Unnur Birna er Ungfrú Ísland

"Mér líður ofsalega vel. Þetta var algjör draumur," segir Unnur Birna Vilhjálmsdóttir, sem kjörin var Ungfrú Ísland á föstudaginn var. "Ég átti alveg eins von á þessu, við stefndum allar að þessu marki og þegar maður stefnir að einhverju verður maður að gera ráð fyrir að það gangi upp." Það er í nógu að snúast hjá fegurstu konu landsins, sem þjálfar af kappi fyrir hestaíþróttamót sumarsins og hefur sumarstörf hjá lögreglunni á Keflavíkurflugvelli í næstu viku. "Ég ákvað að prófa eitthvað nýtt og fór því í inntökupróf í vikunni og náði því. Mig langar að fara í lögfræði í Háskólanum í Reykjavík næsta vetur en á eftir að fá svar." Hún er þó ekki meira en svo viss um hvað nýfenginn titill ber í skauti sér. "Ég veit ekki alveg hvað tekur við en fer á fund með framkvæmdastjóra á morgun og þá skýrist þetta allt saman," segir hin önnum kafna Ungfrú Ísland, sem notaði helgina til að hvíla sig fyrir komandi daga.