Ósætti í fjárlaganefnd

Meirihluti fjárlaganefndar samþykkti í dag, í trássi við vilja stjórnarandstöðunnar, að hætta athugun á einkavæðingu bankanna. Stjórnarandstaðan segir mörgum spurningum enn ósvarað. Lúðvík Bergvinsson alþingismaður segir að stjórnarandstaðan muni nú íhuga hvort þess verði krafist að þing verði kallað saman vegna málsins. Einkavæðingarnefnd beið í rúman klukkutíma eftir að koma fyrir fjárlaganefnd en ríkisendurskoðandi var á fundi nefndarinnar. Fundur einkavæðingarnefndar með þingmönnunum stóð síðan í rúmar þrjár klukkustundir. Eftir fundinn ákvað meirihlutinn að falla frá frekari rannsókn. Stjórnarandstaðan telur hins vegar fulla þörf á því að halda málinu áfram. Komið hafi fram í máli ríkisendurskoðanda í dag að rangar upplýsingar hafi verið gefnar um eignarhald á Hesteyri sem Skinney - Þinganes, fjölskyldufyrirtæki forsætisráðherra, átti stóran hlut í. Hesteyri átti stóran hlut í Keri sem leiddi samningaviðræðurnar um Búnaðarbankann fyrir hönd S-hópsins. Lúðvík segir að þar hafi ekki komið fram að Skinney - Þinganes sé 50% eigandi í bréfi sem einkavæðingarnefnd er sent 2. september. Lúðvík segir þetta og margt annað þarfnast nánari skýringa og veki upp spurningar um hæfi forsætisráðherra í málinu. Stjórnarandstaðan sé afar ósátt við að hætta á þessum tímapunkti og þetta þyrfti að ræða á þinginu. Hann segir því koma til greina af sinni hálfu að kalla Alþingi saman. Meirihluti fjárlaganefndar telur hins vegar nóg að gert. Magnús Stefánsson, formaður fjárlaganefndar, segir að ítarlega hafi verið farið yfir málið og það sé þeirra mat að málið sé upplýst. Aðspurður segir hann að ekki hafi verið óskað eftir því að Halldór Ásgrímsson yrði kallaður fyrir nefndina, ekki frekar en einhverjir aðrir ráðherrar sérstaklega. Það hafi aðeins verið rætt. Aðspurður vill hann ekki fullyrða hvort eitthvað í málinu þarfnist frekari skoðunar.