Spilaði fótbrotinn í sex vikur

Varnarmaðurinn Ashley Cole hjá Arsenal og enska landsliðinu segir að hann hafi óvitandi spilað brákaður á fæti í sex vikur í haust og segir að þess vegna hafi meiðsli hans verið jafn alvarleg og raun ber vitni.

"Ég held að ég hafi storkað örlögum mínum í sumar þegar ég sagði við lækna liðsins að ég væri í svo góðu formi að ég ætlaði að reyna að missa ekki úr leik allt tímabilið," sagði Cole, sem spilaði með brákaðan fót í langan tíma áður en hann þurfti að fara á meiðslalistann hjá Arsenal.

"Ég reyndi alltaf að kæla þetta eftir hvern leik, því ég hélt að þetta væru bara venjulegar bólgur, en eftir að hafa barist við þetta í einn og hálfan mánuð kom í ljós að fóturinn var brotinn," sagði Cole, sem væntanlega verður ekki klár í slaginn á ný fyrr en eftir áramót.