Reyndi að kaupa Crouch

Stuart Pearce, stjóri Manchester City hefur viðurkennt að hann hafi reynt að kaupa framherjann Peter Crouch frá Southampton á sínum tíma, en hinn langi framherji endaði sem kunnugt er í herbúðum Liverpool. Crouch hefur ekki enn náð að skora í nítján leikjum í vetur, en Pearce telur hann þó vera mjög góðan leikmann.

"Ég skil ósköp vel að fólki finnist hann ekki góður leikmaður," sagði hinn hreinskilni Pearce. "Það er nú ekki eins og hann sé mikið fyrir augað strákurinn eða hafi fallegan limaburð, en í knattspyrnu þarftu að spila á árangursríkan hátt og hugsa um það sem hjálpar liðinu. Ég gat ekki betur séð en að Crouch væri besti maður vallarins í leik Liverpool og Betis - svo að hann hlýtur að vera að gera eitthvað rétt,"sagði Pearce og bætti við að um leið og fyrsta markið kæmi, myndi Crouch áræðanlega springa út.