500 þúsund án vinnu eftir Katrínu

Nærri hálf milljón manna hefur misst atvinnu sína vegna fellibyljanna Katrínar og Rítu. Lætur því nærri að fellibylirnir séu orsök fimmtán prósenta alls atvinnuleysis í Bandaríkjunum um þessar mundir. Í síðustu viku bættust fjörutíu þúsund manns á atvinnuleysiskrá á fellibyljasvæðunum. Fyrstu vikurnar eftir fellibylina bættust að jafnaði sjötíu og fimm þúsund manns á atvinnuleysisskrá á svæðunum í kring í hverri viku. Það er því ljóst að áhrif fellibyljanna eru eitthvað að hjaðna. Sérfræðingar í atvinnumálum segja að nú þegar megi rekja fjögur hundruð sjötíu og átta þúsund umsóknir um atvinnuleysisbætur beint til hamfaranna við Mexíkóflóa. Alls eru nú tæplega tvær milljónir og níu hundruð þúsund á atvinnuleysisskrá í Bandaríkjunum. Þannig má rekja meira en einn sjötta af öllu atvinnuleysi í Bandaríkjunum til fellibyljanna Katrínar og Rítu.