Mikil gleði í Danmörku vegna prins

Mikil gleði ríkir í Danmörku vegna fæðingar litla prinsins í nótt. Krónprinsaparið Friðrik og María eignaðist 14 marka son sem var 51 sentímetri. 37 ára er krónprins Friðrik orðin faðir í fyrsta sinn. Hin ástralska eiginkona hans María, sem er 33 ára, fæddi heilbrigðan son í nótt, þegar klukkuna vantaði þrjár mínútur í tvö að dönskum tíma. Fæðingin fór fram á Ríkisspítalanum í Kaupmannahöfn og tók um 10 klukkustundir. Danir sofnuðu þó spenntir því í gærkvöldi bárust fréttir af því að María prinsessa væri komin á sjúkrahúsið, þótt ekki væri staðfest að fæðingin væri farin af stað.  Fulltrúar danskra fjölmiðla biðu spenntir fyrir utan Ríkisspítalann í alla nótt og aukafréttatímar hafa verið í sjónvarpi í morgun. Á blaðamannafundi í anddyri sjúkrahússins í morgun sagði prins Friðrik tilfinningar þeirra hjóna ólýsanlegar og viðurkenndi að hann hefði fellt tár með þeim orðum að á svona stundu ætti maður ekki að leika Súpermann. Drottningin hefur heimsótt fjölskylduna á spítalann og nú í hádeginu var skotið 21 fallbyssuskoti til heiðurs nýfædda prinsinum. Danska þjóðin getur sem dæmi nýtt tæknina til að senda heillaóskir í gegnum SMS-þjónustur og rúlla kveðjurnar stanslaust yfir borða sjónvarpsstöðvarinnar TV2. Tekið verður á móti gjöfum frá almenningi í Amalíuborgarhöllinni í Kaupmannahöfn í dag og á morgun. Klukkan hálfsjö að dönskum tíma verða tendraðir 200 bálkestir um alla Danmörku til að fagna fæðingu litla prinsins, en sérfræðingar veðja á að eitt fjögurra nafna hans verði Kristján samkvæmt hefðinni. Litli prinsinn er þriðja barnabarn Margrétar drottningar og prins Hinriks, en fyrir eiga hin nýskildu Jóakim og Alexandra tvo drengi.