Margir búa undir berum himni

Staðfest hefur verið að ekki færri en 38 þúsund týndu lífi í jarðskjálftanum í Kasmír fyrir viku. Talið er að allt að tvær og hálf milljón hafi misst heimili sín og hafist við undir berum himni í nýstingskulda. Yfirvöld töldu þar til í morgun að fjöldi látinna væri nærri 25 þúsundum, en eftir að fregnir tóku af berast frá einangruðum byggðum og bænum Balakot hækkaði talan í 38 þúsund. Talsmenn stjórnvalda segja allar líkur á að hún muni enn hækka. Úrhellisrigning og haglél varð þess valdandi að allt björgunarflug lá niðri í morgun þar sem þyrlur geta ekki flogið undir þeim kringumstæðum. Sérfræðingar Sameinuðu þjóðanna telja að milljón sé heimilislaus en heimamenn segja nær lagi að gera ráð fyrir að tvær og hálf milljón hafi misst heimili sín. Mikilvægt er að koma fólkinu til bjargar sem fyrst þar sem vetur er í nánd. Víðast hvar hefst fólk við meira og minna undir berum himni en bráðabirgðatjaldborgir spretta upp hratt. Fólk safnar öllu sem það getur til að mynda einhvers konar skjól sem dugir þó lítið þegar gengur á með þrumum og eldingum og hitastigið yfir nóttina er aðeins þrjár gráður. Fólk brennir drasli, timbri úr húsarústum og jafnvel fötum sem hjálparstofnanir hafa flutt á staðinn til að halda á sér hita. Fnykur af þessu brennandi drasli blandast nálykt af líkum í húsarústum. Talsmenn hjálparstofnana hafa ekki síst áhyggjur af börnum við þessar kringumstæður og segja sérfræðingar barnahjálpar Sameinuðu þjóðanna að þau séu í bráðri lífshættu. Börnin eigi erfitt með að þola vannæringu, kulda og jafnvel farsóttir. Starfsfólk Oxfam á hamfarasvæðinu segir að þegar hafi borist fregnir af börnum sem lifðu af skjálftann en þoldu ekki afleiðingarnar.