Vítisenglar á Íslandi

Lögregluyfirvöld staðfesta að Vítisenglar hafi náð hlutdeild á fíkniefnamarkaðnum á Íslandi og lögreglan segir jafnframt að erlendir glæpamenn komi reglulega við sögu hjá lögreglunni, sem er viðbúin frekari starfsemi alþjóðlegra glæpasamtaka á Íslandi. Nítján félagar úr dönsku Hells Angels mótorhjólasamtökunum reyndu að komast til landsins fyrir rúmum þremur árum. Ellefu voru sendir til baka í fylgd þrettán lögreglumanna. Þessar aðgerðir dugðu þó ekki því samtökin, sem eru ein alræmdustu glæpasamtök heims virðast hafa komið sér upp starfsemi hér á landi. Jón H. B. Snorrason hjá efnahagsbrotadeild RLS segir að fíkniefnadreifingin hér á 'Islandi sé angi af skiplagðri glæpastarfsemi sem dreifir fíkniefnum. Hann segir líka ástæðu til þess að ætla að Vítisenglar eigi einhvern hluta af þeim fíkniefnum sem hingað koma. Jón H. Snorrason er yfirmaður efnahagsbrotadeildar ríkislögreglustjórans. Í skýrslu embættisins um skipulagða glæpastarfsemi segir að ekki þurfi nema fáeina félaga úr mótorhjólasamtökum til að hámarksskaði hljótist af. Fréttastofan hefur rætt við menn sem tengjast samtökunum hér á landi en þeir vilja ekki koma fram í mynd, segja vini sína í Danmörku hafa bannað það. Hells Angels glæpasamtökin eru byggð upp eins og mafían. Hershöfðingi, liðþjálfar og fótgönguliðar eru í samstarfi við hina ýmsu glæpahópa. Danska lögreglan hefur áhyggjur fyrir Íslands hönd. Danskur lögreglumaður segir að að Hawkrider gengið í Árósum hafi sent gengi til Íslands og hann telur líklegt að nokkrir hafi sloppið í gegn. Lögreglan telur öruggt að koma hafi átt upp félagsdeild Hawk Riders á Íslandi. Félagar úr mótorhjólaklúbbnum Fáfni telja samtökin saklaus. Jóhann R. Benediktsson, sýslumaður á Keflavíkurflugvelli, segist ekki geta fullyrt hvort Vítisenglar séu með starfsemi á Íslandi en þó segir hann ýmislegt benda til þess að svo sé. Hann segir lögregluyfirvöld reyna að ganga eins langt og lög leyfa í að hindra það að þessir hópar nái hér fótfestu. Jóhann segir einnig að starfsmönnum þeirra hafi verið hótað og segir að þróunin sé lík hér og annars staðar og að þetta komi honum ekki á óvart. Brynjar Níelsson, kunnur verjandi íslenskra og erlendra sakamanna segir að réttarkerfið valdi aukinni hörku á fíkniefnamarkaðnum. Ástæðan re sú að það er svo mikið undir, þungar refsingar og því verði fíknienfnamarkaðurinn sjálfkrafa harðari og skipulagðari. Handtaki lögreglan erlenda glæpamenn þá kynnast þeir íslenskum glæpamönnum í íslenskum fangelsum. Þegar þeir losna út aftur hafa þeir oft myndað sterk tengsl og geta skipulagt saman frekari brotastarfsemi. Um þetta verður fjallað á morgun, í síðustu fréttinni af fimm í fréttaröð fréttastofunnar um alþjóðlega glæpastarfsemi á Íslandi.