Faðir, sonur og móðir prestar

Blað verður brotið í íslenskri kirkjusögu í kvöld þegar sonur starfandi presta verður vígður. Fréttamaður Stöðvar 2 hitti þrenninguna: Föðurinn, soninn - og móðurina. Prestvígslan fer fram í Dómkirkjunni í kvöld þegar Stefán Már Gunnlaugsson verður vígður til Hofsprestakalls í Vopnafirði. Foreldrar hans eru Gunnlaugur Stefánsson, prestur í Heydölum, og móðir hans, Sjöfn Jóhannesdóttir, prestur á Djúpavogi. Aldrei fyrr hefur maður, hvers báðir foreldrar eru prestar, vígst til prests hér á landi áður. Foreldrarnir neita því að hafa þrýst á soninn og tekur Stefán undir það. Hann segist hins vegar alltaf hafa fengið góðan stuðning. Foreldrarnir segja það óneitanlega gleðistund að einkasonurinn skuli vígjast til prests. Eftir því sem fréttastofan kemst næst eru tíu prestar á austurhluta landsins, þau Gunnlaugur, Sjöfn og Stefán Már eru þrír þeirra, þannig að segja má að fjölskyldan sé langt komin með að leggja Austurland undir sig hvað kirkjuna varðar. Gunnlaugur segir að prestaköll þeirra séu lengst í norðri, á Austurlandi og svo í suðri þannig að segja megi að þau séu útverðirnir í kirkjulegu starfi í landshlutanum. Þar sem prestarnir þrír verða allir á sama hluta landsins hlýtur það að vera gott fyrir hinn unga prest að geta leitað til prestanna pabba og mömmu þegar erfið vandamál krefjast úrlausnar. Stefán neitar því ekki að það sé mjög gott að hafa þennan greiða aðgang að allri reynslu foreldra sinna. Ein stærsta spurningin sem menn geta eða hafa spurt sig er hvað eða hver er Guð. Gunnlaugur segist ekki telja að svarið verði auðveldara þó þau þrjú séu prestar úr sömu fjölskyldu. „En Guð er og hann verður og það er næsta víst að það er það öruggasta sem til er í heimi,“ segir Gunnlaugur. Sjöfn og Stefán taka undir það, þótt sonurinn segist geta bætt við það svar en ákveður að gera það ekki að svo stöddu. Stefán á soninn Gunnlaug, sem sýnt hefur kirkjunni mikinn áhuga að sögn fjölskyldunnar, en það á eftir að koma í ljós hvort hann tilheyri þriðju kynslóð presta í þessari fjölskyldu.