Síldin betri en olíulind

Ágætis veiði hefur verið á síldarmiðunum austur af landinu undanfarna daga, en nær alveg hefur tekið fyrir hana síðasta sólarhringinn. Bjarni Ólafsson frá Akranesi fékk til dæmis síld um 40 sjómílur beint austur af Norðfirði í vikunni, en skipin hafa verið mun utar. "Þetta er mikil veisla og rífandi síldarstemmning hér eystra," segir Magnús Þór Hafsteinsson þingmaður og fiskifræðingur, en hann er skipverji á Bjarna Ólafssyni frá Akranesi þessa dagana. Birkir Hreinsson skipstjóri á fjölveiðiskipinu Vilhelm Þorsteinssyni segir að síldveiðiskipin séu nú að leit. "Flotinn hefur verið að lóða á síld víða um sjó en veiðin hefur einkum verið úti við Rauða torgið, djúpt út af Austfjörðum. Sú norsk-íslenska er dyntótt. Við fengum afla aðfaranótt laugardags en skyndilega tók alveg fyrir veiðina og nú ætlum við að leita norður með Austurlandi," segir Birkir. Vilhelm Þorsteinsson var að landa síldarafskurði til bræðslu í Neskaupstað þegar Fréttablaðið hafði samband við Birki skipstjóra í gær. Líkt og á öðrum nútímalegum fjölveiðiskipum er síldin flökuð og fryst um borð, en ágætt verð fæst fyrir hana á erlendum mörkuðum um þessar mundir. "Við reynum að taka ekki meira en 200 tonn í flotvörpuna þegar vel gefur, þannig að við höfum undan við frystinguna. Við getum fryst allt að 150 tonnum á sólarhring og þegar best lætur fyllum við skipið á fjórum sólarhringum," segir Birkir. Um níutíu krónur fást fyrir kílóið af frystum síldarflökum um þessar mundir en afurðirnar eru einkum fluttar til Póllands og þaðan til annarra Evrópulanda. Aflaverðmæti Vilhelms Þorsteinssonar er vart undir 50 til 60 milljónum króna á viku um þessar mundir og ætla má að það eigi við um fleiri skip sem frysta flök um borð. "Nú er bara að veiða síld eins og við getum fyrir fánann og fósturjörðina. Því meir sem við veiðum nú, þeim mun betri verður samningsstaða okkar gagnvart Norðmönnum um veiðar á þeirri norsk-íslensku á næstu misserum," segir Magnús Þór Hafsteinsson.