Kuðungsígræðsla jók málþroska

Óli Þór, 6 ára, er einstakur í sinni röð fyrir þær sakir að hann stendur jafnfætis jafnöldrum sínum í málþroska. Óli Þór fæddist algerlega heyrnarlaus. Valsarinn Óli Þór Sigurjónsson tjáir sig á tveimur málum, talaðri íslensku og táknmáli. Þökk sé tækninni er íslenska hans fyrsta mál en ekki táknmál. Tveggja ára fór hann í kuðungsígræðslu í Svíþjóð. Tæki sem nemur hljóð var komið fyrir í innra eyranu en það sendir rafboð eftir heyrnartauginni til heilans. Með markvissri þjálfun hjá talmeinafræðingi og dyggum stuðningi foreldra, leikskólans, Talþjálfunar Reykjavíkur og Heyrnar- og talmeinastöðvarinnar hefur hann á fjórum árum náð sama málþroska og jafnaldrar hans sem hafa heyrt frá fyrsta degi. Þessi íslenska leið skilar betri árangri en sést hefur hjá nágrannaþjóðum okkar. Bryndís Guðmundsdóttir talmeinafræðingur telur að árangurinn sé að mörgu leyti einstakur vegna þess að Óli sé að ná því að vera því sem næst tvítyngdur á íslensku og táknmál. Það vanti aðeins upp á seinna málið en hann hafi alla færni og allar leiðir til að verða mjög fær í táknmálinu. Regína Rögnvaldsdóttir leikskólasérkennari á leiksóla Óla Þórs segir að þetta hafi gefið góða raun. Óli Þór læri bæði málin sem sé mjög mikilvægt fyrir hann. Óli Þór fer í Hlíðaskóla í haust, þar er deild fyrir heyrnarlaus börn, en til að styrkja þann frábæra árangur sem náðst hefur vill talmeinafræðingurinn að Óli Þór fari í almennan bekk og stundi nám án sérstakrar aðstoðar táknmálstúlks. Í öðrum löndum er fátítt að heyrnarlaus börn gerist svo sjálfstæð í heimi heyrenda, alltént á svo skömmum tíma. Bryndís segir að það vanti að einhver taki hvert og eitt mál að sér og fylgi því eftir frá a til ö. Litli bróðir Óla Þórs er líka heyrnarlaus. Þess stutta, sem er sautján mánaða, bíður seinni kuðungsígræðslan af tveimur síðar á þessu ári. Svo tekur við markviss þjálfun alveg eins og hjá stóra bróður. Kuðungsígræðsla er nýleg aðgerð og hún gagnast ekki öllum heyrnarskertum börnum. Mörgum opnar hún alveg nýjan heim. Óli Þór er lifandi sönnun þess.