Bílsprengjur í Bagdad

Hryðjuverkamenn létu sem fyrr að sér kveða í Írak í gær en þá fórust 22 í tveimur bílsprengjuárásum í Bagdad. Áströlskum gísl hefur verið hótað lífláti kalli Ástralir ekki hersveitir sínar heim á næstu dögum. Sprengjuárásirnar tvær áttu sér stað á Tahrir-torgi í miðborg Bagdad en þar er jafnan saman kominn talsverður fólksfjöldi til að versla. 22 fórust í sprengingunni, þar af tveir Bandaríkjamenn en auk þess slösuðust 35 manns. Á meðal hinna særðu voru telpur á leið í skólann. Bílar og hús eyðilögðust í sprengingunni, sum urðu eldi að bráð. Ibrahim al-Jaafari forsætisráðherra tilkynnti í gær að sátt hefði náðst um það hverjir settust í þá fimm ráðherrastóla sem eftir átti að skipa í, svo og um embætti varaforsætisráðherranna tveggja. Óstaðfestar fregnir herma að súnníinn Saadoun al-Duleimi verði varnarmálaráðherra en sjíinn Ibrahim Bahr al-Uloum verður olíumálaráðherra. Sjónvarpsstöðin Al-Jazeera sýndi í gær myndir af ástralska gíslinum Douglas Wood. Uppreisnarmenn miðuðu að honum byssum og sögðu að Ástralir fengju 72 klukkustunda frest til að kalla herlið sitt heim frá Írak.