Íslensk kaupskip með afslætti

Starfshópur á vegum samgöngu- og fjármálaráðuneytisins telur að aðgerðarleysi stjórnvalda í málum íslenskra flutningaskipa í millilandasiglingum leiði til þess að greinin leggist af. Stjórnvöld geti helst komið í veg fyrir það með því að stofna íslenska alþjóðlega skipaskrá með ríkisstyrkjum líkt og í nágrannalöndunum. Þeirra sé valið. Starfshópurinn sem ekki hefur birt lokaniðurstöðu sína segir beinar tekjur íslenska ríkisins af farmönnum sem skráðir eru hér á landi tæplega 200 milljónir króna. Hvorki sé hægt að segja til um hve mikið tekjurnar skerðist flytjist útgerðin alfarið burt né hvort sami árangur náist og í nágrannalöndunum. Með niðurstöðunni tekur hópurinn undir sjónarmið Vélstjórafélagsins, forsvarsmanna Sjómannasambandsins og Samtaka atvinnulífsins. Sjómannafélag Reykjavíkur setur, að sögn Birgis Hólms Björgvinssonar gjaldkera, fyrirvara við stofnun íslenskrar alþjóðlegar skipaskrá. Hún hugnist félaginu aðeins verði farið að íslenskum kjarasamningum við launagreiðslur til sjómannanna. Starfshópurinn, sem skipaður er tveimur starfsmönnum úr hvoru ráðuneytanna og einum frá Siglingastofnun, telur að kjósi stjórnvöld aðgerðir sé vert að fara sömu leið og gert er í nágrannalöndunum sem í nær öllum tilfellum er í formi skattaívilnana til útgerða og sjómanna ásamt styrkjum til menntunar og þjálfunar. Í Noregi, Danmörku og Svíþjóð séu siglingar blómstrandi útflutningsatvinnuvegur og í tveimur þeirra skipi greinin annað og þriðja sæti í öflun útflutningstekna. Írar hafi einnig á þremur árum náð að fjölga skipum um 70 prósent og atvinnutækifærum í greinninni um 17 prósent þegar reglum var breytt. Þar sé fyrirtækjaskatturinn lægstur eða 12,5 prósent. Athygli vakti þegar Samskip skráði tvö ný skip í Færeyjum ásamt áhöfnum þeirra. Ekkert skip er nú skráð hér í millilandasiglinum en sex íslenskar áhafnir. Allar hjá Eimskipum. Fjármálaráðherra vildi ekki tjá sig um málið, að sögn aðstoðarmanns, þar sem málið verði tekið fyrir á Alþingi á morgun.