Frábær tíðindi

Leikskólamál - Flosi Eiríksson Reykjavíkurborg hefur lýst því yfir að hún stefni að því að gera leikskólann gjaldfrían í áföngum. Er hér um mikla kjarabót að ræða fyrir íbúa borgarinnar en um leið er undirstrikuð sú jafnaðarhugsjón að aðgangur að leik- og grunnskólum eigi að vera öllum greiður án tillits til efnahags. Raunar hefur Akureyrarkaupstaður einnig kynnt hugmyndir í þessa veru, um gjaldfrían leikskóla að hluta. Þetta er sérstaklega ánægjulegt fyrir okkur jafnaðarmenn hér í Kópavogi, en í sveitarstjórnarkosningunum 1998 settum við fyrst fram slíkar hugmyndir hér í bænum og höfum raunar lagt slíkar hugmyndir til við fjárhagsáætlun á svo til hverju ári síðan. Þær hugmyndir hafa alltaf verið felldar af framsóknar- og sjálfstæðismönnum. Það er því eiginlega ekki nema hlægilegt þegar Ómar Stefánsson, bæjarfulltrúi Framsóknar hér í bænum, skrifar á heimasíðu sína um framgöngu Reykjavíkur og Akureyrar "Báðar þessar hugmyndir eru mjög góðar og í anda þess sem við framsóknarmenn í Kópavogi höfum verið að tala fyrir." Andi framsóknarmanna hefur nú ekki verið sterkari en svo að Ómar hefur alltaf greitt atkvæði gegn öllum hugmyndum og tillögum í þessa veru. Vonandi verður framganga Reykjavíkurlistans og yfirlýst stefna flokksþings Framsóknar um gjaldfrían leikskóla til að hjálpa framsóknarmönnum í Kópavogi að safna kjarki og þori til að greiða atkvæði eftir sannfæringu sinni og "anda" og láti af undirlægjuhætti sínum við Sjálfstæðisflokkinn. Það væru góð tíðindi. Höfundur er bæjarfulltrúi Samfylkingarinnar í Kópavogi.